O Delegado Territorial da Xunta en Ourense, Rogelio Martínez, acompañado polo Xefe Territorial da Consellería de Traballo e Benestar, José Selas, foi o encargado de inaugurar este martes as xornadas nas que se da a coñecer  a guía de actuación coordinada contra o maltrato de maiores ou persoas adultas con discapacidade a máis dun cento de profesionais deste sector.
As xornadas, que comezaron en Santiago de Compostela e que rematan en Ourense, teñen como obxectivo dar a coñecer esta ferramenta, a primeira destas características de ámbito autonómico que existe en España convertendo así a Galicia en “pioneira na abordaxe concreta dunha realidade que non sempre sae á luz, que é de difícil detección e que precisa dunha actuación especialmente metódica e protocolizada”, sinalou Martínez.

“A iniciativa servirá para informar de forma detallada aos profesionais do sector sobre cal é o protocolo de actuación de cada un dos axentes implicados ante unha situación ou sospeita de maltrato e os documentos que teñen que utilizar para dar conta da situación a outros axentes ou para solicitarlles información ou a súa intervención”, asegurou o delegado da Xunta en Ourense.

Concebido como un instrumento de apoio aos profesionais, a guía conten diversa información. Así, nela pódese atopar unha selección de normativa de aplicación que serve de marco legal e xurídico; e tamén un marco teórico coa definición de maltrato e os indicadores para detectalo.
O documento tamén inclúe esquemas de actuación, os mecanismos a través dos que se poden comunicar estes casos; e, ademais, contén modelos de comunicados e solicitudes oficiais destinados a solicitar a intervención de distintos axentes; como as forzas de seguridade, a Fiscalía ou a Xunta.

Esta ferramenta cumprirá, ademais, a función de coñecer e rexistrar a incidencia real deste comportamento en Galicia, ao poder funcionar a modo de rexistro único. Ata o momento, non había un instrumento claro de comunicación, polo que non se rexistraban debidamente todos os casos.