Tamén explicou que a aposta fundamental deste ano é a calidade asociada aos establecementos da cidade, xa que os restaurantes ourensáns acadan as mellores puntuacións en canto a niveis de satisfacción.
A Concellería de Turismo repite presenza en Xantar cun stand propio, como ven sendo habitual. Desta forma búscase a promoción dos atractivos da cidade no seu conxunto, facendo especial fincapé na gastronomía, coas propostas da guía de restaurantes e a ruta de pinchos na Cidade Vella. Nesta cuestión, hai que subliñar a presenza, no propio recinto feiral, dun restaurante propio do Concello de Ourense cun menú arredor da festividade do Entroido así como a adhesión de 16 establecementos de Ourense e a provincia ao Salón, o cal supón unha mostra da presenza da gastronomía ourensá na oferta de Xantar.

Pola súa banda, o Vicepresidente Executivo de Expourense, Celso Barbosa, destacou a importancia dos diversos paquetes turísticos que teñen como obxectivo fomentar a asistencia de público de fóra da provincia a visitar Ourense, conseguindo desta forma, reforzar un dos obxectivos da cita: promocionar o turismo a través da gastronomía. Sobre esta cuestión falou tamén o Xerente de Expourense, Alejandro Rubín, subliñando que todos os visitantes que acudan a Xantar en tren dende calquera parte de España terán un desconto do 30%, algo que inclúe tamén a alta velocidade con ofertas especiais para visitar a nosa cidade dende A Coruña e Santiago de Compostela. O invitado especial deste ano serán as illas Azores, que a través das súas Cámaras de Comercio, terán especial protagonismo ao longo de todo o salón gastronómico.

Nesta XIII edición participan un total de 19 restaurantes que ofrecerán un total de 30 menús de Galicia, Andalucía, Estremadura, Castela – León e rexións turísticas de Portugal, tal e como se citou anteriormente.