Segundo a delegación Territorial da Xunta en Ourense, o obxectivo desta iniciativa é impulsar e visualizar o noso consumo nos mercados municipais galegos, así como potenciar a figura profesional das praceiras e praceiros. “Son traballadores que garanten un servizo profesional e personalizado, ademais de ofertar  produtos fresco de alimentación, especialmente galegos, e que son dunha altísima calidade”, sinalou o Delegado Territorial da Xunta en Ourense.
Nesta campaña, ademais do sorteo de cheques de desconto entre os consumidores, a Consellería pretende recoñecer a figura destes traballadores a través da posta en marcha dunha votación do profesional mellor valorado, para o que foi necesario a colaboración dos clientes.

En cada un dos mercados municipais participantes o procedemento foi o mesmo: cada praceira e praceiro entregou un cupón por compra aos seus clientes para que puidesen participar na campaña e no que, ademais dos seus datos, quedou reflectido o seu voto á mellor ou ao mellor profesional. Neste segundo sorteo, resultaron premiadas tres participacións con bonos de desconto de 25, 50 e 75 euros, que se poderán utilizar no propio mercado. Nestes sorteos determínase tamén a praceira ou praceiro preferido polos consumidores de cada mercado.