As cabazas volverán tomar as rúas da Cidade vella de Ourense este luns, 31 de outubro, no tradicional desfile de Samaín que organiza outro ano a Concellería de Cultura do Concello de Ourense. O departamento que dirixe a nacionalista Isabel Pérez, convida aos veciños e veciñas da cidade, especialmente os máis cativos, a revivir esta celebración de orixe céltica que forma xa parte do patrimonio inmaterial galego.
A Praza da Imprenta será o punto de partida do desfile, e a concelleira e tenente de alcalde sinalou que o Samaín e este desfile non son algo que Ourense importe doutros lugares, "senón que exportamos ao mundo, como parte do noso acervo cultural".

A ruta marcada para este ano decorrerá, a partir das 19:00 Hs.,  pola rúa Colón, Praza Maior, rúa da Paz, praza do Ferro, Fornos, praza dos Suaves, praza do Trigo e Rúa Hernán Cortés para rematar na praza de San Marcial. O fin de festa correrá a cargo do asociación "A Run run" que ofrecerá un espectáculo para os máis pequenos.
A Tenente Alcalde destacou na presentación deste Samaín do 2001 o “compromiso común” de axentes privados e goberno local por manter a oferta festiva e cultural de pasados anos, amosando a súa disposición “a seguir traballando para que teñan continuidade a pesar dos tempos complicados que estamos a vivir”.