Unha escolma da vida e da obra do Padre Silva, creador e impulsor do Circo de los Muchachos‐Nación Benposta, comporá a exposición que poderá visitarse este vindeiro 17 de maio na vila ourensá de Vilanova dos Infantes, coincidindo no marco doutra edición da Romaría Raigame. O acto é unha homenaxe que esta parroquia de Celanova quere render ao mundo do circo e ao seu fundador, Jesús Silva.

Fotografías, cartelería e numerosas pezas gráficas comporán a mostra sobre a figura e a obra do Padre Silva, nunha exposición que promove a Asociación Cultural Padre Silva, invitada polo Concello de Celanova a participar neste anual evento.
Na exposición, destaca o papel relevante que tiveron na obra de Benposta-Los Muchachos tanto o seu fundador, Jesús Silva, como o seu tío-avó, Secundino Feijóo, fundador do Circo Feijóo e promotor do circo moderno en España.

A Asociación Cultural Padre Silva que artella esta exposición, naceu no seu día para recuperar e poñer en valor a memoria e a obra do Padre Silva, tentando actualizar a súa formulación como experiencia de aprendizaxe e plataforma para o desenvolvemento de mozos comprometidos cos valores que inspiraron a experiencia de Benposta e o Circo de Los Muchachos.
"La Ciudad de Los Muchachos de Benposta foi un proxecto único, unha experiencia de mellora da sociedade coa educación, as artes e o circo como baluartes", sinala a Asociación, que subliña que o seu proxecto "prioritario" a día de hoxe está a ser "recuperar a actividade de Benposta cunha nova visión global, aberta á participación de calquera persoa que comparta os valores e os fins cos que no seu día naceu este proxecto".