A concelleira de Limpeza, Susana Bayo, acompañada da concelleira de Voluntariado, Mónica Vázquez, o presidente da Asociación de Comerciantes da Praza de Abastos, Emilio González, e María Durán, representante da Asociación Amigos da Terra presentaron este xoves unha campaña que persigue a redución de bolsas dun só uso entre os clientes da praza de Abastos.
A iniciativa, promovida polas Concellerías de Limpeza, Igualdade e Voluntariado en colaboración coa Asociación Amigos da Terra e a Asociación de Comerciantes da Praza de Abastos, consistirá no reparto de flyers informativos e na instalación dunha caseta con voluntarios, para informar a clientes e comerciantes das consecuencias que ten para o medio ambiente o emprego de bolsas dun só uso.

A campaña, denominada Os produtos da praza na bolsa da casa, incluirá sorteos de carriños da compra entre os clientes que merquen os seus produtos sen empregar bolsas de plástico -por cada cinco compras, un cupón de sorteo-. Os clientes recibirán unha tarxeta de participación para acumular selos polas compras que efectúen, e lles será entregada unha bolsa ecolóxica por cada compra.
A idea da Concellería de Limpeza é acadar a eliminación total da bolsa dun só uso nos hábitos de compra, co fin de evitar as fatídicas consecuencias para o medio ambiente que provoca o seu emprego. O tríptico informativo inclúe os seguintes datos, que afondan nos motivos polos que surxiu o lanzamento da campaña:

- Cada persoa emprega ao ano unha media de 234 bolsas dun só uso.
- A "vida útil" de cada bolsa dun só uso é duns 20 minuto (mercado-casa-lixo).
- Cada bolsa de plástico tarda 150 anos como tempo estimado en desfacerse (os seus compoñentes químicos permanecen contaminando).
- Para producir unha bolsa emítense 4 gr. de CO2 á atmósfera.
- Cada ano emítense en España 441.000 toneladas de CO2 á atmósfera para producir bolsas dun só uso.