A concelleira de Educación, Ana Garrido, vén de presentar a programación de actividades para o curso escolar 2012- 2013, que o ano pasado contou con 34.000 participantes, sen contar as actividades promovidas pola Concellería nos meses de verán.
Entre as principais novidades para este curso académico destaca o programa de apoio educativo, que presta por primeira vez o Concello.
O servizo dará atención a escolares de Educación Infantil e Primaria dos colexios públicos da cidade. Consiste, en prestar un servizo de atención lúdico educativa aos nenos e nenas que acuden ao comedor escolar, realizando actividades, dende que remata o horario do comedor e ata as 17.00h, para favorecer a conciliación da vida laboral e familiar das familias, permitindo a nais e pais recoller aos nenos unha hora máis tarde do remate da actividade do comedor.

O programa ten coma obxectivos "afianzar e complementar os coñecementos académicos, aumentar a oferta lúdico educativa, promover a integración social e a maior soliedariedade cos rapaces máis necesitados e axudar á conciliación", sinala o departamento de Ana Garrido.
O servizo de atención lúdico educativo prestarase durante a semana nos CEIP Manuel Sueiro, Covadonga, As Mercedes, Irmáns Villar, CEE Miño, A Ponte, Mestre Vide, Manuel Luis Acuña, Mariñamansa, Mende e Inmaculada.

Novidades para o novo curso

Os nenos e nenas de Educación Infantil e Primaria, poden participar de Tertulias Literarias e dun novo curso de animación á lectura, sendo a temática sobre a que xiran todas as actividades Ollando os nosos artistas, co obxectivo de que os cativos cooñezan aos escultores, arquitectos, escritores, pintores e intelectuais ourensáns. Dentro deste programa destacan actividades coma Esculpindo os contos no que se realizará unha homenaxe ao escultor Arturo Baltar, o Roteiro de Artistas ourensáns, andaina lúdico- lectora pola zona vella da cidade, ou o Obradoiro para profesores: o pucheiro dos sentidos, no que se levará a cabo unha aprendizaxe de técnicas plásticas e artesanais con recursos naturais.

Estas actividades daranse cita ao longo de todo o curso académico e levan aparellado o I concurso de microrelato online Ollando aos nosos artistas con motivo da conmemoración do Día das Letras Galegas co que se quere fomentar a capacidade creativa do alumnado empregando as novas tecnoloxías do 3º ciclo de Educación Primaria, Secundaria e Formación Profesional.

No eido da saúde, o proxecto SHE do Doutor Valentín Fuster, abanderará o apartado de adquisición de hábitos saudable, cuxo obxectivo é a defensa de que a mellor maneira de previr enfermidades cardiovasculares e mellorar a calidade de vida nos adultos é a prevención dos seus factores de risco nos nenos. No programa xa están inscritos 15 centros de ensino da cidade, e os profesores recibiron o mes pasado un curso formativo co obxectivo de que os nenos adquiran hábitos de vida saudables.

No ámbito deportivo a novidade, é o programa de xadrez na escola que ten coma obxectivo dar a coñecer as bases para fomentar a socialización dos nenos e nenas e crear entre eles vínculos de comunicación e amizado e empregar o xadrez como arma pedagóxico para mellorar o seu rendemento escolar futuro.

Os mozos de 4º de ESO, bacharelato e ciclos superiores, poderán desfrutar da lingua inglesa a través da música co espectaculo Aquarius que mistura cancións dos 60 e 70 e conferencias en inglés impartidas por Rupert Marshall, antropólogo, director de teatro e músico. Mentres que os que estean a cursar 3º de Educación Infantil e o 1 ciclo de Educación Primaria, a través da novidosa actividade MusiCán, aprenderán música e inglés a través do traballo en equipo, con sesións de unha hora impartidas por dous monitores especializados.

Teatro, cine e danza completan a amplia oferta da Concellería de Educación co espectáculo de danza contemporánea “Dos de danza” coa actuación da bailarina ourensá Maruza Salas, a obra O home almofada, o I concurso de deseño de carteis para o festival MOTECES e a proxección da curtametraxe X nada e posterior conferencia sobre o ciber acoso dirixido aso alumnos e alumnas de 4 da ESO, bacharelato e ciclos superiores de FP.

Ademáis, neste novo curso ofértanse para profesores e ANPAS cursos e obradoiros sobre temáticas transversais como a convivencia escolar, primeiros auxilios e actuacións en casos de emerxencia, cusos de ligua inglesa ou conferencias sobre conflictividade. Neste cursos, e dende unha óptica participativa e lúdica, búscase a implicación de mestres, nais e pais na educación dos nenos e nenas dentro e fóra da escola e o seu obxectivo e adquirir os coñecementos necesarios para poder axudar oas nenos e mozos nas súas dúbidas cotiás.