Dar apoio a 42 asociacións e entidades que desenvolven o seu labor na cidade, acometer investimentos urxentes en mellora de infraestruturas e termalismo e amortizar anticipadamente débeda municipal son os principais obxectivos do expediente de modificación dos orzamentos do Concello que prepara o goberno municipal.
O concelleiro de Economía e Facenda, José Ángel Vázquez Barquero presentou o expediente aos grupos políticos de PP, BNG e DO no transcurso da Xunta de Área que se celebrou este mércores.
O concelleiro de Economía dixo ofrecer aos grupos políticos a posibilidade de falar acerca desta modificación antes de que sexa aprobada coa vontade de acadar o maior grao de consenso posible.
O expediente ascende a 8,6 millóns de euros, exactamente 8.664.534.

Tomada a decisión de non tramitar un novo orzamento para 2013, e mantendo prorrogado o de 2012, "o Goberno municipal prepara esta modificación coa finalidade de afrontar gastos que non deben demorarse, e que permitirán dar apoio a entidades que desenvolven o seu labor na cidade, principalmente ONG que traballan no terreo da sáude e o benestar social, xunto con convenios con diferentes entidades (673.237,55 euros) afrontar investimentos urxentes en materia de infraestruturas na cidade e perímetro rural (664.000), acometer as expropiacións necesarias para desenvolver o Ben de Interese Cultural das Burgas (1.050.000), e amortizar débeda (6.262.521,92 euros)", sinalou Vázquez Barquero.

O Goberno municipal presentará o proxecto de modificación orzamentaria para o visto bo da Xunta de Goberno Local, e posteriormente ante o Pleno do Concello para aprobación inicial, e exposición pública polo prazo de 15 días hábiles, durante os que os interesados poderán examinalo e presentar as reclamacións que estimen oportunas.
O expediente considerarase definitivamente aprobado se non se presentaran reclamacións.