Este venres, 21 de xuño, comezan oficialmente as Festas de Ourense 2013, que darán paso a 10 días de numerosas actividades que encherán de vida e de cores as rúas e prazas da cidade.
Melendi ofrecerá o primeiro gran concerto destas Festas. Será a partir das 00.00 h en Expourense. Un pouco antes, a partir das 21.30 h, os Amigos dos 60 celebrarán o seu tradicional encontro na Cafetería do Xardín.

Para o sábado está reservado o pregón destes festexos, a partir das 22.00 h na Praza Maior. O escritor e xornalista ourensán, Camilo Franco, será o encargado da súa lectura. Posteriormente, e no mesmo lugar comezará o concerto de Vocal Tempo, que nos deleitarán só cos seus micros, sen ningún instrumento, aínda que escoitaremos trompetas, tambores, percusións, guitarras e baixos.

"Danza, títeres, teatro de rúa, microteatro, música con selo ourensán, e tamén internacional, mercado medieval, o mellor rock do estado ... en total máis de cen actividades ata o vindeiro día 30 para que todas e todos se divirtan da mellor das maneiras", sinala a Concellería de Cultura do Concello de Ourense.

O domingo, o concerto de Eli Paperboy Reed

Un dos pratos fortes destas Festas de Ourense 2013 terá lugar o vindeiro domingo 23 de xuño a partir das 23.00 h no Xardín do Posío. A esa hora dará comezo a actuación gratuíta de Eli Paperboy Reed, und os mellores soulman do momento. O Xardín do Posío acollerá o concerto gratuíto deste recoñecido soulman, a partires das 23:00 Hs.

O recoñecido cantante Eli Paperboy Reed naceu en Boston en 1983. O seu alcume ven da súa especial forma de levar unha gorra que pertenceu ao seu avó e que recorda aos antigos repartidores de xornais.
Para este concerto, Eli Paperboy estará acompañado pola banda catalana The Peppers Pots. A relación entre eles xurdiu de forma casual. Tras coñecerse nun concerto e falar por internet de facer algo conxunto, o supergrupo chegou a un acordo: lanzar un EP que recuperase en certa forma temas de soul “ocultos”. Así naceu Time And Place, un proxecto que saca da sombra cancións esquecidas de Fontella Bass e Bobby McClure, Lee Moses, Jimmy Lewis e Kip Anderson.