O Concello de Ourense abriu este mércores ao público o novo Espazo Coeduca, ubicado no Centro Municipal de Información á Muller (CIMM), na rúa do Ensino nº 24, onde tamén se atopan as dependencias da Concellería de Igualdade.
O novo espazo inclúe dúas salas: unha primeira dirixida aos cativos, cunha ampla zona de xogos, biblioteca e mesas e cadeiras para debuxar; e outra sala multiusos na que se disporá de acceso a intenet, pantallas, retroproxector, pizarras e mesas de traballo, dirixida ós obradoiros con pais e nais e adolescentes.

O novo Espazo Coeduca ten coma obxectivo "fomentar a educación en liberdade, tolerancia, convivencia e respeto, a través de prácticas coeducativas con menores, adolescentes, e os seus pais, nais e titores", sinala o Concello de Ourense, que engade o seu interés por promover "un espacio alternativo e complementario ao ámbito educacional formal, que persiga un modelo coeducativo creando un entorno igualitario de aprendizaxe e lecer adaptado ás necesidades e aos tempos das familias e paralelamente apoialas na ardua tarefa da conciliación da vida laboral e persoal".

Mónica Vázquez, concelleira de Igualdade, destacou que "desenvolver conductas igualitarias, onde os nenos e nenas se sintan protagonistas, onde a diversidade e a equidade se convirtan nas ferramentas esenciais do desenvolvemento integral das persoas, é o noso obxectivo prioritario".
O espazo, dirixido ás familias ourensanas, os centros de ensino e as ANPAS, está enmarcado no Plan para a Promoción da Equidade de Xénero do Concello de Ourense 2010-2014.

Dende este novo espazo poranse en marcha actividades para os meses de verán, con continuidade ó longo do vindeiro ano. Actividades de aprendizaxe, lúdicas e deportivas que posibiliten a formación e entretemento dos nenos e nenas ao tempo que se sensibiliza aos pais e nais en materia de xénero, fomentar a lectura e contribuír ao enriquecemento das súas capacidades e habilidades incentivando a aprendizaxe cooperativa e o desenvolvemento de actitudes respetuosas e solidarias coas demáis.
Ademáis disporase dunha ampla oferta para os adolescentes, con obradoiros de supervivencia doméstica e de autocoidado e conductas saudables, actividades deportivas, obradoiros de prevención da violencia sexual e resolución de conflictos persoais e cursos de autoestima e autocoñecemento persoal.
Nestes cursos empregarase unha metodoloxía  integradora, motivadora activa e participativa, nun proxecto no que se implica a tódolos membros da unidade familiar.

Actividades inmediatas para os meses de verán

Entre xuño e setembro desenvolveranse actividades dirixidas a nenas e nenos e os seus pais como contaconto, lectura e escritura creativa, teatro, baile, cociña, masaxes, cine de verán, ludoteca ou xogos interxeneracionais.

Este verán (dende o 2 de xullo ó 31 de agosto, de luns a venres) o calendario de actividades será o seguinte:

- Os luns de 11.00h. a 13.00h. Expresión corporal e dramatización
- Os martes de 18.30h a 19.30h Masaxes en familia
- Os mércores de 11.00h a 13.00h Expresión plástica e artística
- Os xoves de 18.30h a 20.30h Espazo compartido en familia
- Os venres de 11.00h a 13.00h Cociña creativa

Todas as actividades serán gratuítas e o espazo só pechará as fins de semana e o mércores 25 de xullo e o 15 de agosto.