A concelleira de Limpeza do Concello de Ourense, a socialista Susana Bayo, anunciou este mércores que a partires deste xoves, día 17 de xaneiro, serán instalados ao longo de toda a cidade un total de 32 colectores para a recollida de roupa, elementos textís e calzado. Susana Bayo e Pedro Andrés Oliver, director xeral de Texlimca, empresa concesionaria do servizo, precisaron as condicións do contrato e as ubicacións concretas dos colectores.

A recuperación de roupa usada para a súa reciclaxe, ou a súa reutilización, supón beneficios ambientais e económicos, incidindo nunha maior reutilización de tecidos e roupas ou o aproveitamento das súas materias primas, sinalou a concelleira Bayo.
Deste xeito, coa implantación dun sistema integral de recollida, reciclado e reutilización destes residuos se reducirá a entrega de impropios á Sociedade Galega de Medio Ambiente (SOGAMA).
A Concellería de Limpeza estima un aforro duns 8.000 euros ao ano coa implantación deste sistema, e unha media de reciclaxe de 1,3 quilogramos de roupa ao ano por ourensán.

Son prendas obxecto de depósito nestes novos contenedores, xerseis, camisas, camisetas, faldas, pantalóns, cazadoras, chaquetas, bañadores, chándals, vestidos, polos, traxes, abrigos, lencería, roupa interior, garavatas, panos, bufandas, etc.
Roupa de fogar: sabas, mantas, fundas, mantelerías, cortinas, toallas, albornoces, edredóns, etc.
Pero tamén, aínda que non sexan produtos textís, zapatos, botas, sandalias, calzado deportivo, etc., e complementos coma bolsos, carteiras, gorras, abanos, sombreiros, cinturóns, etc., así coma xoguetes.

Os cidadáns deben introducir as prendas en bolsas pechadas, tanto para facilitar o posterior transporte, optimizando os tempos de recollida, como para evitar unha posible contaminación dos contidos dun colector.
Os modelos de colector instalados, denominados wippy xuquer, teñen unha capacidade de volume interior de 2.700 litros, e están dotados de chapas de aceiro galvanizado. Contan cunha boca aberta composta por unha noria que xira en sentido vertical, evitando a sustración das bolsas depositadas unha vez introducidas.