UNICEF entregará o día 9 de novembro, nunha gala que se celebrará na cidade de Málaga, un recoñecemento ao Concello de Ourense polo seu proxecto pioneiro da Concellería de Educación, a horta ecolóxica interxeracional de Mariñamansa.
O recoñecemento enmárcase no VI Certame de Boas Prácticas nos dereitos da infancia e política municipal deste ano das Cidades Amigas da Infancia, que promove e difunde os dereitos da infancia no eido local, e que neste ano celebra o seu 10º aniversario no noso país, segundo ven de informar o Concello de Ourense.

En marzo de 2011, o Concello puxo en marcha a horta educativa interxeracional. O espazo está situado na zona de Mariñamansa, na beira dereita do río, cunha extensión de 2.000 m2 distribuídos en 22 parcelas, 18 para os veciños, 2 destinadas a persoas con mobilidade reducida e 2 de maior superficie dirixidas a fins educativos e sociais.
As hortas están pnatexadas como unha alternativa de ocio, representando ademais espazos de convivencia que posibilitan a integración dos sectores sociais máis desfavorecidos, como a 3ª idade, parados de longa duración, ou persoas con algunha minusvalía, permitindo un intercambio xeneracional de coñecementos e experiencias, fomentando a participación cidadá e a transmisión de tradicións rurais na actual sociedade urbana.

Impulsar o respeto polo medio ambiente, recuperar espazos urbáns e promover unha alimentación sá e hábitos saudabéis, proporcionando lugares que permitan realizar actividades físicas e mentais en contacto coa natureza, mellorando a calidade de vida, son os obxectivos da iniciativa do Concello a través da Concellería de Educación.
"Para nós é unha satisfacción porque supón un recoñecemento que nos anima a seguir traballando polos máis pequenos e axudar a que se convirtan en cidadáns máis responsables coa súa cidade e o seu entorno", sinálase agora dende a Concellería de Educación deste Concello da capital ourensá.