A Concellería de Saúde do Concello de Ourense organiza dous obradoiros de relaxación e saúde emocional, dirixidos a todo tipo de persoas, maiores de 18 anos. Incluidos no programa Ourense saudable, nestes obradoiros se traballará tanto a saúde física como a mental, xa que o equilibrio entre ambas nos levará a ter unha vida saudable.

O obxectivo desta iniciativa é dotar aos participantes de estratexias e capacidades para afrontar as situacións de risco ás que estamos sometidos ao longo da vida, dende un punto de vista emocional e social buscando o seu benestar. Os interesados poden inscribirse dende esta semana e ata o venres, 2 de novembro. Os obradoiros son gratuítos, disporán dunha metodoloxía dinámica, activa e participativa e desenvolveranse na Aula Municipal de Promoción da Saúde, na rúa Vasco da Ponte, 1.

O obradoiro de relaxación profundizará na eficacia dos procedementos de relaxación para unha boa calidade de vida, e no tratamento de problemas relacionados coa tensión, insomnio, hipertensión esencial, dores de cabeza, asma bronquial e tensión en xeral, ou como coadxuvante en moitas condicións, tal como a ansiedade a falar en público, as fobias, ou a ansiedade, entre outras. O obradoiro pretende fomentar o equilibrio emocional, dar a coñecer técnicas de relaxación, musculares e de control da respiración, mellorar a calidade de vida activa e previr a ansiedade. Con 25 prazas, desenvolverase os martes e xoves do mes de novembro, dende o día 6, de 10:30 a 11:30 horas.

O obradoiro de saúde emocional, con 20 prazas, será os venres do mes de novembro, de 11:30 a 13:30 horas, dende o 9 día. Ten como obxectivo dotar aos participantes de estratexias e mecanismos que nos axuden a enfrontarnos aos cambios emocionais, fomentando a autoestima e os sentimentos positivos. Contará con bloques sobre saúde mental-emocional, recoñecemento da ansiedade, tratamentos de estrés, autoestima e habilidades persoais.