A Xunta de Goberno Local aprobou na súa xuntanza deste xoves o Plan de Seguridade e Saúde do Proxecto básico e de execución de demolición de edificios de vivendas na rúa do Vilar 14 e 16, para apartamentos turístico termais no mercado tradicional do rianxo- Hortas, nas traseiras das Burgas.

O plan adxudícase por un importe de 14.160 euros e implican "un paso máis na posta en valor das Burgas de acordo coas previsións do Plan Estratéxico Termal e o Plan Especial de Protección e Reforma Interior deste Ben de Interese Cultural", aprobado polo Pleno do Concello no mes de xaneiro, sinala o propio Concello de Ourense.
Aos 4 apartamentos turístico-termais previstos na zona, súmase unha cafetería e local de merchandising e salas de exposicións que veñen completar o proxecto de posta en valor das fontes termais das Burgas e o seu contorno que promove o Concello de Ourense.

Todos os proxectos teñen o obxectivo común de reforzar o atractivo da zona, onde tamén se está a construír o Centro de Interpretación Turístico Termal da cidade, xa adxudicada a súa dotación de equipamento, convírtese nun espazo interpretativo expositivo sobre os mananciais mineromedicinais das Burgas e a historia da cidade converténdose nun punto de encontro coa historia e a evolución de Ourense ao longo dos séculos.
Concíbese coma un proxecto divulgativo e didáctico, que proporcione ao visitante unha concepción global do termalismo mediante ferramentas e propostas audiovisuais e interactivas, que nos permitirán coñecer e facer máis comprensible a temática termal e afondar na historia e cultura da nosa cidade.

O bulevar peonil, nas traseiras das fontes, que comunicará a rúa das Burgas coa rúa do Baño, únese ao proxecto arqueolóxico de posta en valor e recuperación dos restos romanos atopados no contorno das Burgas
O proxecto pretende garantir a conservación dos restos arquelóxicos atopados nas mellores condicións posibles, e paralelamente acometer as actuacións necesarias para facer accesible este espazo ao público e que veñen a completar o proxecto de posta en valor desta área de interese cultural.