A Concellería de Benestar Social do Concello de Ourense destinará un orzamento de 52.920 euros en subvencións a aquelas asociacións da cidade sen ánimo de lucro, cuxo obxectivo prioritario sexa atender as necesidades sociais na cidade..
Dende a Concellería de Benestar Social quérese promover unha nova convocatoria de subvencións para este ano 2012, co fin de potenciar todas aquelas actividades sociais que contribúan a mellorar o benestar social dos veciños de Ourense, podendo optar a unha subvención as actividades promovidas polas asociacións de maiores e as actividades de carácter social promovidas por calquera entidade sen ánimo de lucro, sinala o correspondente acordo adoptado neste sentido pola Xunta de Goberno Local.

Todos aqueles interesados poderán presentar a súa solicitude a partires de esta semana, tendo en conta que terá que ser ao día despois da publicación das Bases no Boletín Oficial da Provincia, e no prazo dun mes a contar dende a súa publicación.
Segundo as bases reguladoras da convocatoria, poderán solicitar unha subvención as asociacións con fins sociais do Concello de Ourense e de modo particular as Asociacións de Maiores e as asociacións ou entidades que realicen actividades de carácter social.

Os interesados deberán presentar a instancia no rexistro Xeral do Concello que debe incluír os datos da entidade ou particular que solicite a subvención, acompañada dunha memoria explicativo das actividades que se levarán a cabo e a financiación prevista para a realización das actividades.
As solicitudes recibidas valorarán a calidade técnica do proxecto presentado e a súa adecuación aos programas presentados, a continuidade de programas xa iniciados en anteriores convocatorias, a innovación do proxecto e inexistencia de programas similares.

Proxecto de asesoramento e información á poboación inmigrante

O Concello de Ourense tamén ten en marcha un novo proxecto destinado ao asesoramento e á formación da poboación inmigrante, co fin de facilitar e favorecer a súa integración e socialización. Para o cumprimento de este tipo de iniciativas a Concellería de Benestar Social solicitou da Xunta de Galicia, da Secretaría Xeral de Inmigración, a súa inclusión no  programa de concesión de subvencións dirixidas a este fin, por importe de 87.850 euros.

O Concello, a través da Oficina Técnica de Atención a Inmigrantes e da Rede de Centros Cívicos da cidade, sinala a súa intención de contribuir a informar e asesorar á poboación inmigrante, colectivo formado por 3.607 persoas na nosa cidade, ao tempo que lle proporciona orientación social e xurídica.