A Xunta de Goberno Local deste xoves vén de aprobar a primeira das fases que o Concello de Ourense acometerá no Parque do Barbaña con motivo da súa remodelación e acondicionamento. Na fase aprobada este xoves, a Concellería de Medio Ambiente investirá 170.000 euros, e centrarase no proxecto de remodelación da zona de xogos infantís, a que sufriu máis desgaste nos máis de 15 anos de historia do parque.

Concretamente, nesta primeira fase,  trala retirada de aparellos, xogos infantís e mobiliario urbán afectados, renovarase a superficie total das zonas infantís, que abarca 842 m2 distribuído en dúas zonas, dotándoas de novo pavimento elástico de seguridade, e reduciranse as pendentes, mellorando a accesibilidade á zona. Asimesmo, incorporaranse novas varandas para mellorar a protección da zona e a propia accesibilidade á zona infantil. Para a protección das catro árbores da zona de xogos colocaranse alcorques de fundición dúctil enrasados co novo pavimento.
Fases de actuación
En posteriores fases, nas que se investirá un total de 500.000 euros, executarase o acondicionamento e mellora das zonas verdes e sistema de rego, terá lugar unha fase de revexetación, mellora de viais e de iluminación, sinala o Concello de Ourense.

O concelleiro de Medio Ambiente, Demetrio Espinosa, xustifica a remodelación por fases como “consecuencia do tamaño e a complexidade do parque", e considera necesarias as actuacións de mellora por ser "un dous máis frecuentados de toda a cidade”. “Pola súa situación no centro da cidade, non debe pecharse, senón todo o contrario, mellorar a accesibilidade para cidadáns de tódalas idades e características”, sinalou Espinosa.