En total, o Xacobeo 2010 programou para este ano na provincia  de Ourense un cento de eventos culturais en 31 concellos, e nos vindeiros meses desenvolveranse na provincia unha vintena de actos incluídos na súa programación, sinalaron este xoves o delegado da Xunta en Ourense, Rogelio Martínez, e o director xerente da S.A. de Xestión do Plan Xacobeo, Ignacio Santos.
Os dous subliñaron a ampla variedade de propostas culturais para a provincia con motivo da celebración do Ano Santo, na que “non falta de nada. Hai para todos os gustos e idades”, dixo Rogelio Martínez.

Segundo as contas do delegado Territorial da Xunta en Ourense, a provincia de Ourense acolleu durante os oito primeiros meses do ano, preto de 80 eventos culturais programados en 31 concellos, contabilizando tanto os de organización propia como os patrocinios.
Neste período, achegáronse á provincia “artistas relevantes da escena musical actual”, citándose os casos dos patrocinios das actuacións de Fito&Fitipaldis ou Macaco, ou doutros artistas internacionais como Chris Isaak.
Por outra banda, desenvolvéronse na provincia de Ourense contidos de calidade como exposicións ou, no campo das artes escénicas, percorreron os escenarios ourensáns a célebre obra Master Class, patrocinada por Xacobeo. Dentro da programación propia, desenvolvéronse as actuacións de Nova Galega de Danza e

tamén houbo tempo para a música clásica da man do ciclo Xacobeo Classics, do festival Via Stellae, e para a música galega, incluída no ciclo Xacobeo Raíces.

Martínez asegurou que “esta cantidade de eventos son unha boa proba do compromiso da Xunta de Galicia coa provincia de Ourense, do seu apoio firme ás rutas xacobeas e, en definitiva, do respaldo que ofrece o Goberno galego ao Camiño da Ruta da Prata”.
O director xerente da S.A. de Xestión do Plan Xacobeo, Ignacio Santos, destacou que unha das grandes propostas para esta provincia terá lugar este mesmo domingo no pavillón Paco Paz, que acollerá a partir das 21.00 horas o concerto do lendario artista Leonard Cohen, unha actuación para a que as entradas postas á venda xa están esgotadas.
Ignacio Santos recalcou que esta cita, da que gozarán 3.900 persoas, “converterá a Ourense nun punto de referencia no panorama musical nacional e internacional”.