O conselleiro de Medio Ambiente, Territorio e Infraestruturas, Agustín Hernández, xunto co alcalde do municipio, Argimiro Marnotes, inaugurou esta tarde as obras de urbanización e pavimentación da contorna do Templo de Veracruz, no Concello de Carballiño, no que a Xunta investiu 1,2 millóns de euros.
Hernández destacou o esforzo realizado polo Goberno autonómico para executar unhas actuacións que teñen por obxectivo poñer en valor este templo de gran valor arquitectónico. Engadiu que un proxecto como este, do arquitecto Antonio Palacios, necesitaba unha contorna á súa medida. "Á vista do resultado, hoxe pódese afirmar que O Carballiño ve finalizado o proxecto máis esperado da última década", afirmou o conselleiro.

Hernández recordou que este proxecto foi posible grazas á súa inclusión dentro do Plan Hurbe, co que o Goberno galego puido levar a cabo máis de 60 actuacións noutros tantos concellos galegos e que se traducen nun investimento de 86 millóns de euros para os municipios.
Os traballos executados melloraron unha área de máis de 8.000 m2, consistindo na pavimentación e implantación dos servizos urbanísticos de abastecemento e saneamento, enerxía eléctrica, alumeado público e telefonía.
A Xunta lembra que na actuación final se tivo en conta as propostas de colectivos veciñais, do Concello ou a Igrexa como a conservación integral da zona axardinada existente ao sur do templo ou do trazado actual do muro que delimita os xardíns pola rúa dos Canteiros.
Este proxecto de urbanización e pavimentación tamén implicou a rectificación do trazado dos pavimentos das beirarrúas da rúa dos Canteiros, adaptado ao muro de sillería citado no punto anterior. Tamén se reservou unha zona para actos públicos na confluencia da rúa dos Canteiros con Antonio Palacios, aproveitando o desnivel con escalinatas a modo de gradas.

Pola súa banda, o rexedor carballiñés, o popular Argimiro Marnotes, matizou que a nova praza da Veracruz "non a recibimos nós senón todos os veciños do Carballiño, esta praza, este entorno é deles".
Marnotes, que agradeceu a Consellería de Medio Ambiente, Territorio e Infraestruturas o esforzo económico realizado a prol desta reforma, manifestou que "hoxe é un día grande, este 20 de xuño de 2013 é un día especial para todos nós". E lembrou que esta obra fixo realidade un desexo de máis de 20 anos de moitos veciños do Carballiño.
"Non se recorda no Carballiño, unha obra, unha infraestrutura, unha instalación, non se recorda nada comparado con esta praza. Nada neste pobo, sin telo feito, foi tan comentado durante tantos anos. Nada se ten comentado mais que a necesidade de que o noso Templo da Veracruz, contase cun espacio público no seu contorno que o protexese, pois protexendo ao Templo, protexeríamos ao Carballiño", sinalou o alcalde de O Carballiño.