O Concello de Ourense ven de anunciar a posta en marcha a través da Concellería de Turismo, da campaña Ourense, capital do Entroido, que pretende aproveitar o atractivo turístico destas datas para promocionar os sectores termal, cultural e gastronómico da cidade, cun variado abano de ofertas e promocións competitivas. A concelleira de Turismo, Mónica Vázquez, acompañada de Javier Outomuro, representante da Unión de Hosteleiros, entre outros, presentaron este mércores dita campaña e o conxunto de ofertas que inclúe.

A finalidade da campaña, que da continuidade á de anos anteriores, é "abrir a cidade a tódalas persoas que se acheguen a Ourense atraídos polo Entroido, á vez que se ofrecen máis motivos aos veciños para saír á rúa e desfrutar do ambiente festivo", sinalou a concelleira. A proposta incorpora ofertas de restaurantes, aloxamentos e termalismo, agrupando un total de 12 hoteis, 18 restaurantes con menús especiais, aos que se unen ofertas das estacións termais de Outariz e Chavasqueira, a piscina das Burgas e Balneario de Laias.

Así, a oferta da cidade será variada e asequible para todos os petos, con prezos "máis que competitivos", segundo valorou a titular de Turismo, Mónica Vázquez. A campaña inclúe a distribución de 5.000 folletos na rúa, hoteis e oficinas de información das cidades veciñas para aproveitar o arrastre turístico, así coma o contacto, promoción e relación directa dende a web e as redes sociais, con Internet como soporte de comunicación protagonista.
Así mesmo o Entroido ourensán estará presente na Feira Internacional de Turismo (FITUR), en Madrid, sendo un dos elementos principais do stand de Galicia.

Dende a Concellería de Turismo preténdese manter ou incluso mellorar as cifras de ocupación hoteleira do pasado ano, que se achegou ao 80%.  A concelleira de Turismo, Mónica Vázquez, calificou o Entroido na nosa cidade coma "o centro dun triángulo máxico formado por Verín, Xinzo e Laza, do que a capital quere participar aportando tradición e participación cidadá".