O Centro Cultural Marcos Valcárcel da Deputación acollerá entre os días 30 de outubro e 3 de novembro un ciclo de cine árabe baixo a denominación de Amal Musical-Music Film Fest on Road e no que a música será o eixo de unión das diferentes proxeccións.
"A música é unha forma de expresión que ten unha orixe ancestral nas culturas árabes, o mesmo que en Galicia. É unha linguaxe sensible e universal que ao igual que o cine pode unir os pobos de todo o mundo e levarnos a establecer novas vías de comunicación e diálogo", sinalan os organizadores deste ciclo.

Este ciclo está organizado polo Festival Amal e conta coa colaboración da Deputación de Ourense a través do Centro Cultural Marcos Valcárcel, ademais de outros recintos culturais de Galicia coma o MACUF (A Coruña), o MARCO (Vigo) ou a Rede Museística de Lugo.
Tódalas proxecións no Centro Cultural serán ás 20:00 horas e terán acceso libre e gratuito. Abriranse o día 30 con Brigding the Gap, unha película realizada en Alemaña no ano 2007 sobre  o famoso músico e compositor Rabin Abou-Khali, un mediador entre Oriente Medio e Occidente. A película sígueo nas súas residencias de Munich e Beirut e nos seus ensaios coa BBC Orchestra en Londres.

O día 31 proxéctase Festival in the Desert. Creado no ano 2011, os homes azuis do deserto visten roupas occidentais e tocan guitarras eléctricas. Sobre a area do Sahara as culturas mesturanse, coma a voz de Robert Plant cos ritmos Tuareg. O festival do deserto acerca e une realidades.

Para o día 2 de novembro está programada Checkpoint Rock. Cancións dende Palestina, firmada por Javier Corcuera e Fermín Muguruza. Neste film ponse voz e melodía a Palestina, aos seus músicos, á súa vida, ao seu destino e ao tempo que lles tocou vivir e que se reflicte nas súas letras e melodías.

Finalmente, o ciclo pèchase o día 3 de novembro con Next Music Station, Marrocos, un documental no que se percorre  a vida musical de Marrocos como capital da vangarda musical do norte de África. Participan a Orquestra Chekara de Tetuán, OUM, H-Kayne, Hamid el Kasri, Karima  Skali e Khadja El Ouarzazia.