O Boletín Oficial da Provincia de Ourense ven de publicar as bases que rexerán a convocatoria de subvencións da Concellería de Cultura do Concello de Ourense para asociacións culturais sen ánimo de lucro que desenvolvan proxectos na cidade, así como a convocatoria de subvencións en especie para a realización de programas festivos en barrios e parroquias. Deste xeito, a convocatoria convértese en firme e o proceso e totalmente operativo a partires de agora.

"A Concellaría de Cultura renova así un ano máis o seu compromiso co fomento das   actividades lúdicas e culturais na cidade, prestando apoio ás entidades que traballan neste eido. A finalidade é posibilitar a realización de actividades de promoción, animación e difusión da cultura, diversificando os axentes e mantendo un carácter plural e cidadá", sinala o departamento que dirixe a tamén tenente de alcalde do Concello de Ourense, a nacionalista Isabel Pérez.

O orzamento total que se destina ao apoio a asociacións e entidades é de 148.750 euros, subvencionando até un máximo do 75% un proxecto por solicitante.  Poderán optar a estas subvencións as persoas físicas ou xurídicas, asociacións, comisións de festas e entidades sen ánimo de lucro, legalmente constituídas que desenvolvan accións destinadas á promoción e cooperación cultural e a difusión e animación sociocultural que contribúen ao espallamento e promoción da cultura galega no ámbito do Concello de Ourense. Outro dos requisitos é atoparse ao corrente coas obrigas fiscais co Concello e ca Seguridade Social.

Aqueles interesados dispoñen de 40 días naturais contados a partir do 18 deste mes de agosto para tramitar as súas solicitudes mediante instancia no rexistro xeral do Concello de Ourense dirixida á Concellaría de Cultura. Se a documentación presentada fose incompleta ou presentase erros emendables, haberá un prazo de 10 días hábiles para corrixir a falta ou xuntar documentos preceptivos, coa advertencia de que, de non o facer, se considerará que desistiu da súa solicitude e procederase ao arquivo desta.
A valoración das solicitudes efectuarase ponderando criterios coma o interese xeral da actividade, interese sociocultural, número de persoas que participan e se benefician da acción, ou a calidade, interese, orixinalidade e carácter innovador.

Apoio ás festas nos barrios

No relativo ás subvencións en especie para a realización de programas festivos, a concellaría de Cultura destina un orzamento de 27.677,80 euros para o apoio a celebración de festas patronais nos distintos barrios da cidade.

O obxecto da convocatoria son persoas físicas ou xurídicas, comisións asociacións e entidades sen fin de lucro que realicen actividades de interese municipal dentro do Concello ou en beneficio deste. Ao igual que no caso das subvencións á asociacións culturais, non poderán ser destinatarios aquelas entidades que non se atopen ao corrente das súas obrigas fiscais co Concello de Ourense ou a Seguridade Social.

Os que desexen acollerse a esta convocatoria, deberán presentar a correspondente solicitude no prazo de 40 días, contados a partir do seguinte ao da publicación da mesma no Boletín Oficial da Provincia. Aqueles interesados en solicitar a subvención, poderán facelo mediante unha instancia no rexistro xeral do Concello de Ourense dirixida á Concellaría de Cultura.