O Concello de Castrelo de Miño, en colaboración co Parlamento Europeo a través da eurodeputada Ana Marianda, organiza este sábado, día 22 de xuño, unha xornada de traballo ao título Retos e oportunidades para o sector vitivinícola galego.
Está previsto que na mesma tomen parte destacados representantes de todas as denominacións de orixe, as cinco, de Galicia, algúns aínda por confirmar.

O obxectivo desta xoranda será "informar e debater sobre a repercusión da futura normativa europea no sector, sobre estratexias de comercialización, o papel de apoio dos consellos reguladores e sobre as posibles formas de colaboración e asociacionismo en beneficio do sector vitivinícola", sinala o Concello de Castrelo de Miño que organiza esta xuntanza.

Lémbrase que o Parlamento Europeo ven de aprobar a Política Agraria Común, PAC, que establece unha parte significativa das regras de xogo para o sector vitivinícola a partires do ano que ven e ata 2020, como, por exemplo, os dereitos de plantación.