O Grupo Municipal do Partido Popular no Concello de Ribadavia celebra o feito de que sexa a Deputación de Ourense a que, dende este primeiro de setembro, se faga cargo do servizo de recollida de lixo e da limpeza da capital do Ribeiro.
Así o sinala o portavoz do Grupo Popular, César Fernández, quen alude a un dobre motivo de satisfacción polo cambio de titularidade do servizo.

Por unha banda, porque o servizo lle sae ás arcas municipais máis económico. "Unha vez máis a realidade é a que pon a cada un no seu lugar, xa que nesta cesión do servizo á Deputación o Concello sae gañando economicamente, e tamén no que se refire á calidade do servizo", sinala o portavoz popular.
"Unha mellora que puidemos comprobar esta mesma mañá, na que se levou a cabo unha necesaria limpeza de contedores en diferentes untos do Concello, un feito que levábamos moito tempo sen ver", sinala César Fernández referíndose a estrea dos servizos da Deputación na titularidade da concesión da limpeza de Ribadavia.

Por outra banda, o portavoz popular sinala que, ao facerse efectiva a cesión do servizo, ponse fin á irregularidade administrativa na que estaba a incorrer o Concello dende o 1 de xullo de 2009, "posto que dende esta data non existía un contrato que regulara a relación entre a anterior empresa concesionaria e o Concello".
Irregularidade a que hai que engadir o feito de que se lle debía a dita empresa 85.444 euros, o que foi resolto polo Plan de Pago a Provedores articulado recentemente polo Goberno Central.

A este respecto, o Grupo do PP convida ao de Goberno "a que lle explique aos veciños de Ribadavia por que razón estivo dende o 1 de xullo de 2009, data na que se extinguiu o contrato coa empresa concesionaria, ata o 1 de setembro de 2012, mantendo unha situación que supuña peor servizo para os veciños e un maior gasto para as arcas municipais".