Xulio César Iglesias e Laura Valcárcel, de Amencer, e María Devesa, concelleira de Xuventude do Concello de Ourense, anticiparon xa este mércores a programación e os detalles da XXVI edición do Campamento Urbano de Amencer. Un clásico dos meses de agosto nesta cidade, que volverá a celebrarse entre o 1 e o 13 do vindeiro mes de agosto.

Coma en anos anteriores, o campamento está destinado a rapaces de 8 a 15 anos -e máis de 15 anos para o xuvenil-, nunha oferta aberta, libre e gratuíta, a fin de que poidan participar todos aqueles rapaces que o desexen, e que pasen as súas vacacións de verán na cidade de Ourense.
O obxectivo é "promover actividades de ocio e tempo libre educativo, á vez que se proporciona aos nenos unha integración completa co entorno natural, social e cultural, fomentando a súa capacidade de participación en promovendo a convivencia co coñecemento mutuo", sinalaron os responsables da iniciativa.
Entre as actividades que se ofertan atópase a animación á lectura, obradoiros, psicomotricidade, deportes, novas tecnoloxías, ludoteca, xogos organizados, termas, visita a bibliotecas ou cine.

O horario do campamento urbano é de 10:30 h. a 13:30 h. e de 16:30 h. a 19:30 h. Os interesados poden facer a inscrición na sede de Amencer, sita no colexio Salesianos ou na Concellería de Xuventude, sita na Praza de San Martiño número 2, baixo. Os organizadores estiman a participación duns 700 rapaces.
A concelleira de Xuventude, María Devesa, salientou que unha das claves para manter o apoio do Concello na actividade é "que para 3 de cada 4 nenos é a súa única experiencia en campamentos, o que amosa que moitos queren, pero non todos poden participar nas actividades que lles gustaría".