A terceira edición do programa da Concellería de Saúde Ociourense chega esta fin de semana ao seu fin, coa celebración de dúas das actividades principais do programa. Este sábado, a partir das 18:00 Hs. na Praza Maior dará comezo a Búsqueda do Tesouro, consistente nun xogo de pistas que premiará a rapidez e a destreza á hora de superar unha serie de probas.  Esta actividade está dirixida a maiores de 15 anos, que participarán no xogo por parellas.

Con esta iniciativa, o Concello de Ourense pretende fomentar as rutas biosaudables que combinan os beneficios dunha camiñata con paradas para o acondicionamento físico, e paralelamente amósannos a cidade na que vivimos, dentro dun ambiente lúdico.

A partir das 9 da maña, celébrase o domingo unha Andaina saudable, que significará a clausura do programa, e que conmemora o Día Mundial Sen Tabaco, que se celebra este 31 de maio. A andaina, que consta de 10.000 pasos -a recomendación diaria para un adulto san- sairá da Alameda do Concello ás 10:00 Hs.. e discorrerá pola beira do río Miño, durante seis quilómetros. Ao remate da andaina, os participantes recibirán obsequios vencellados a estilos de vida saudables.

O percorrido exacto é o seguinte: Alameda do Concello, Ponte Pedriña, Avenida Pardo de Cela, paseo Ribeiriño, Ponte Romana, pasarela do Centro Comercial Pontevella, Ribeira de Canedo, e volta pola Pasarela de Oira, Paseo de Monforte, e paseo Barbaña, con chegada de novo á Alameda do Concello. Un total de 10.000 pasos, aproximadamente son 6 kilómetros, con desnivel e dificultade baixos.