O Obradoiro de Olería e o Museo de Olería ubicados en Xunqueira de Espadañedo demandan a Deputación de Ourense a súa potenciación, tanto para impartir cursos especializados en artesanía oleira, no caso do obradoiro, como para promocionar cultural e socialmente o aspecto etnográfico coa exposición de pezas antigas e actuais, no caso do museo, para dar a coñecer a historia e evolución desta arte.
Así o coñeceu de primeira da man dos seus responsables este xoves, o presidente da institución provincial, Manuel Baltar, nunha visita que serviu tamén para coñecer en detalle as necesidades e proxectos do concello en materia de infraestruturas, entre as que destacan o acondicionamento de viais e a realización de melloras na Casa do Concello.

Tamén se falou da planificación urbanística do municipio, en concreto da sinatura realizada recentemente entre o alcalde e o conselleiro de Medio Ambiente, Agustín Hernández, da acta de aprobación definitiva do PXOM do municipio, un plan que establece que máis do 94% da súa superficie está protexida para que se conserven os valores naturais, ecolóxicos e patrimoniais.
Segundo este documento, o 4,32 % da superficie queda definida como solo de núcleo rural, o que supón ordenar e recoñecer os asentamentos tradicionais.
Así, Xunqueira de Espadañedo poténciase como núcleo rural capital e favorécese o desenvolvemento dos outros doce núcleos rurais, permitindo asentar neles novas vivendas.