O Consello da Xunta de Galicia aprobou na súa reunión deste xoves o Decreto de cambio de titularidade dun treito de algo máis dun quilómetro da estrada OU-313, a prol do concello ourensán da Bola, concretamente no núcleo rural de Rairigo, desde o punto quilométrico 6+500 ata o 7+730, final do concello.
"A cesión é conveniente co obxecto de simplificar e facilitar a tramitación de permisos de edificacións nas súas marxes, construción de infraestruturas e servizos urbanos, etc.", sinala o acordo da Xunta, que establece, asemade, que o Concello asumirá a súa titularidade e mantemento.

O expediente tramitouse ao abeiro da Lei de estradas que establece que os cambios de titularidade das mesmas se aprobarán por decreto da Xunta de Galicia, por proposta da consellería competente en materia de estradas e logo do acordo entre as administracións afectadas e que as estradas autonómicas ou provinciais ou os treitos determinados delas en que a circulación adquira características urbanas se entregarán aos concellos respectivos.

De acordo co exposto, o Concello de Bola deberá incorporar ao seu plan de estradas a vía a que se refire este decreto. Así mesmo, a este municipio correspóndenlle, a partir da formalización da entrega, todas as actividades de xestión, mantemento, conservación e explotación deste treito; así como o exercicio das funcións de disciplina viaria e calquera outra que puidese corresponderlle como nova Administración titular da estrada.
A entrega da vía formalizarase no prazo de dous meses seguintes á publicación deste decreto no Diario Oficial de Galicia, único trámite agora pendente para facer efectivo o acordo.