O Museo Municipal acolleu este mércores a última presentación que terá lugar neste ano 2012, que corresponde á obra Miradas duras, Miradas blandas, do artista ourensán de adopción, Juan Manuel Lazcano. A exposición inaugúrase oficialmente o venres ás sete da tarde, e permanecerá neste espazo municipal ata o 10 de febreiro do vindeiro 2013 ocupando as Salas I e II.

"O Concello de Ourense, a través da concellería de Cultura, continúa desta maneira co apoio aos artistas ourensáns, coma é Lazcano, que vén traballando desde fai máis de dous anos cunha perseverancia pigmentaria a partir de fortes e sentidas pinceladas", sinala os responsables do departamento que dirixe Ana Garrido.
Nesta exposición, Lazcano mostra a súa última colección con dous ambientes, un intensamente dramático inspirado en Goya e outro cálidamente envolvente, entendendo que ambos arrancan dun expresionismo no seu máximo grao.

A mostra consta dunhas 60 pinturas, das cales o primeiro andar alberga 26 obras pictóricas – entre as que hai 4 conxuntos formados por dípticos e trípticos -, na súa maioría de formato grande. No segundo andar  hai expostas 25 obras de formato, pequeno e medio, tamén cun tríptico e un díptico.