A Deputación de Ourense pon en marcha a VIII edición do Obradoiro de xogos tradicionais, iniciativa que foi presentada este venrese que este ano achegará a máis de 1.200 nenos da provincia de Ourense a cultura etnográfica do noso lecer. Segundo o presidente da Deputación de Ourense, unha cultura que "forma parte das tradicións lúdicas e socializadoras que hai que seguir mantendo porque é o noso maior tesouro inmaterial".

Xunto con Mariló Fernández Senra, directora do Centro de Cultural Popular Xaquín Lorenzo, Baltar Blanco subliñou que este obradoiro                           "potencia as actividades que a institución provincial está a desenvolver no ámbito da infancia, as cales, neste caso, contribúen a revalorizar o noso patrimonio etnográfico".
Manuel Baltar agradeceu o traballo que tanto a directora do Centro de Cultural Popular como o equipo que traballa nas propostas pedagóxicas fan a prol da conservación das nosas tradicións, e lembrou que actividades como a revista e a Romaría Raigame, "son un referente no eido da etnografía e a traza da Deputación de Ourense no que atinxe á recuperación e potenciación das nosas tradicións culturais e sociais".

Pola súa banda, Mariló Fernández Senra explicou que no curso 2012-2013 participarán no Obradoiro máis de 1.200 nenos pertencentes a 44 centros educativos pertencentes á capital e outros 29 concellos da provincia de Ourense. A cifra global dos nenos que teñen participado nesta iniciativa desde o seu comezo, hai oito anos, supera os 6.000, e supón unha das actividades infantís máis demandadas polos centros educativos, e que está dirixida a nenos de entre 8 e 14 anos.
Mariló Fernández Senra afirma que con este proxecto "non pretendemos volver ao pasado, senón traer ao presente as nosas tradicións para entender mellor a nosa historia e poñer en valor o noso".

Os diferentes xogos que se propoñen no obradoiro van dende a billarda aos zancos, pasando por xogos bailados, a chave, a rá, os bolos, as tabas ou os xogos de ritmo, entre outros. Todo o material necesario para a realización do obradoiro facilítano o CCP Xaquín Lorenzo e a Deputación de Ourense.
Asemade, a Deputación de Ourense preparou un programa específico de xogos tradicionais para o Nadal, que a institución provincial realizará en colaboración con seis concellos da provincia.