Megaxove, o Salón da Xuventude, abriu este venres as súas portas en Expourense, convertido na mellor alternativa de lecer para esta ponte festiva e para toda a familia. Xa nesta primeira xornada, segundo os organizadores, a Megaxove contou con numerosa afluencia de público que participou de forma activa en todas as alternativas, 75 actividades, das que dispoñen os 8.000 metros cadrados de instalacións ao servizo deste Salón da Xuventude.

Aquí se dan cita 40 expositores entre federacións e clubs deportivos, asociacións culturais e xuvenís de toda Galicia. Expositores e entidades colaboradoras con Megaxove elaboraron un completo programa de campionatos, exhibicións, torneos e obradoiros cuxo obxectivo non é só a diversión, senón o fomento de valores como o compañeirismo, a solidariedade cos máis desfavorecidos, o traballo en equipo, a tolerancia, a igualdade ou ó respecto ao Medio Ambiente.

Entre as novidades do programa de actividades de Megaxove 2012 destacan as exhibicións de baile urbán como o funky ou o hip-hop, un simulador de Fórmula 1 ou os obradoiros de costura Manga Anime que ensinan a coser disfraces de personaxes.
A entrada e de balde en horarios de 11:00 a 14:00 pola mañá, e de 4 a 8 da tarde.