A cidade de Ourense estará presente na Feira das Industrias Culturais Culturgal, que se inaugura este venres no Pazo da Cultura de Pontevedra, e se prolongará ata o vindeiro domingo, día 2 de decembro.
A través da Concellería de Cultura, o Concello de Ourense contará cun espazo no que haberá información sobre toda a actividade cultural que se leva a cabo ao longo do ano, e que comprende o Ciclo Festivo Anual.
Tamén haberá información sobre o Festival de Cine de Ourense e sobre a oferta termal da cidade.

Culturgal é unha feira da que participan distintos sectores da cultura coma o libro, o audiovisual, as artes escénicas, música, deseño e novas tecnoloxías. Está organizada pola asociación Culturgal, entidade da que forman parte as asociacións profesionais máis representativas do sector coma son: a Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Produtoras Fonográficas (Agaphono), Empresas Galegas Adicadas a Internet e ás Novas Tecnoloxías (Eganet) e Asociación Galega de Produtoras Independentes (Agapi).