Nove nenos rusos afectados polas consecuencias da radiación de Chernóbil de 1986, e que pasaron o verán na provincia de Ourense, visitaron o Concello este venres, onde foron recibidos pola concelleira de Benestar Social, Marga Martín.
A iniciativa da Asociación Ledicia Cativa, en colaboración co Concello de Ourense, acolleu estes meses de xullo e agosto a 9 nenos, de idades comprendidas entre os 6 e os 17 anos.
Os nove nenos foron acollidos por familias ourensás, seis deles pasaron o verán na cidade de Ourense. Os nenos estiveron acompañados por Daria Toropova, unha monitora encargada de  solucionar o seus problemas na súa estadía vacacional.

Os nenos proceden da rexión de Briansk na localidade de Novozhyblov, unha zona  moi próxima a Central de Chernóbil, contaminada pola radioactividade. O obxectivo do programa de acollida é a recuperación física e sanitaria dos nenos afectados pola radioactividade.

A cidade de Ourense, ofrécelle a posibilidade de desfrutar dun clima benigno, libre de contaminación á que están sometidos, o que lle aporta unha recuperación de ata o 40%. Os dous meses de vacacións permítenlle mellorar substancialmente a súa calidade de vida, alongando ata dous anos a súa esperanza de vida. Ademais do cambio físico notable, existe un enriquecemento interno, xa que coñecen unha nova cultura, unha nova lingua, uns novos costumes e establecen uns fortes vínculos coas familias de acollida.

A través deste programa de acollida, establecen vínculos afectivos e culturais, ademais da asimilación dos principios e valores da nosa sociedade, de gran importancia para o seu futuro.