A Consellería de Cultura, Educación e Ordenación Universitaria, por medio da Secretaría Xeral de Política Lingüística, e máis o concello de Lobios, adherido á Rede de Dinamización Lingüística (RDL), presentan nesta localidade ourensán o programa de cinema de verán e proxecta o filme Vilamor.

Deste xeito o programa de Redecinema, presenta neste concello, nunha proxección na que estivo presente o secretario xeral de Política Lingüística, Valentín García, e de forma gratuíta a película dirixida por Ignacio Vilar que está a ter un gran éxito a nivel internacional. Cómpre recordar que Vilamor, rodado en Galicia e en galego foi estreado en Ourense o pasado 17 de maio. A pesar da súa curta andaina, xa colleitou o recoñecemento de dentro e de fóra das nosa fronteiras (Cannes, Nova York, Jakarta...).

Redecinema leva achegando o cine e este filme desde o pasado 7 de agosto, que comezou en Cee (A Coruña) e desde entón percorreu os concellos da RDL e así continuará ata o vindeiro mes de setembro.
Así, un total de 38 localidades de Pontevedra, Ourense e A Coruña acollerán o novo programa de dinamización lingüística da RDL durante este verán.

Os obxectivos cos que nace o novo programa de dinamización lingüística entroncan cos recollidos no Plan xeral de normalización da lingua galega, que aspira a promover a creatividade con base en galego e mais a aumentar a oferta de produtos de cultura e de ocio na nosa lingua. En especial, para promover o uso do galego nas actividades lúdicas e de lecer; para visibilizar a acción dinamizadora en lugares abertos e públicos; para potenciar artistas e dinamizadores galegos, e mais para favorecer a incorporación do galego á programación das actividades para o verán realizadas nos concellos.

A RDL é unha iniciativa da Xunta de Galicia que busca a asociación voluntaria de entidades con competencia na promoción do uso da lingua galega no ámbito local para impulsar e reforzar as iniciativas de difusión do galego. Os seus principais obxectivos son os de promover a coordinación, a colaboración e a cooperación das actuacións en materia de dinamización lingüística e optimizar os recursos dispoñibles.
Canda a Deputación da Coruña, a Deputación de Pontevedra, a Deputación de Ourense e a Xunta de Galicia, na actualidade forman parte da RDL máis dun terzo dos concellos galegos.