Ao longo do mes de agosto participarán nas actividades da Aula de Natureza do Concello, situada no paseo de Oira, case un centenar de rapaces que desfrutarán das posibilidades lúdicas e educativas que ofrece o entorno natural da ribeira do Miño ó seu paso por Ourense, segundo ven de informar o Concello de Ourense.

"As actividades ofertadas polo Concello na Aula de Natureza de Oira continúan durante o mes de agosto co obxectivo de concienciar ós nenos da importancia da conservación do medio ambiente como parte fundamental da súa vida e saúde", sinala o Concello. Todo isto, a través de actividades que van dende o coñecemento da fauna e flora da provincia de Ourense ata outras de reciclaxe, xogos populares, traballos na horta, formación sobre incendios forestais, recuperación e liberación de aves ou recuperación de xogos populares.

Durante este mes de agosto, algunhas das charlas que se ofreceran aos nenos versarán sobre o cambio climático, a importancia da seguridade e o bo uso de Internet, a limpeza de montes e ríos, a reciclaxe e a reutilización de materiais ou o funcionamento das piscifactorías. O programa presenta un amplo e variado abano de actividades coas que aportar ós máis pequenos un entretemento instrutivo nun entorno san e natural.

Segundo a Concellería de Educación que organiza directamente estas actividades, búscase fomentar a conciliación da vida laboral e familiar, e proporcionar aos pais e nais traballadoras alternativas nos meses de verán, e paralelamente combinar o ocio e a formación, de  xeito que os rapaces gocen dun verán lúdico e educativo.