Este sábado, 75 estudantes que participan na XXV edición dos Cursos de verán de lingua e cultura galegas para estranxeiros e españois de fóra de Galicia, que organizan a Real Academia Galega, o Instituto da Lingua Galega da Universidade de Santiago de Compostela e mais a Secretaría Xeral de Política Lingüística da Xunta de Galicia, participarán nunha xornada de inmersión lingüística, cultural e paisaxística na Galicia interior que se desenvolverá entre Allariz e Celanova.

Acompañados polo director dos cursos Francisco Fernández Rei, pola secretaria dos cursos Ana García García, por varios profesores e guiados por Xosé Antón Laxe Martiñán, 75 estudantes (dos 85 matriculados) percorrerán Allariz, logo irán xantar a Celanova para despois coñeceren a vila, e visitaren a Casa dos Poetas e o Mosteiro de San Rosendo.

Por outra parte, o vindeiro luns moitos dos estudantes desta XXV edición dos Cursos de verán de lingua e cultura galegas para estranxeiros e españois de fóra de Galicia, farán lectura de poemas de Celso Emilio Ferreiro para o programa especial que sobre o poeta celanovense está a programar a emisora da Cadena Ser de Lugo