Os días 24 e 25 deste mes de maio, xoves e venres desta semana, a Concellería de Igualdade do Concello de Ourense organiza as II Xornadas Municipais dos Bancos do Tempo, "Usos dos tempos e medidas de conciliación: harmónicos ou invisíbeis?". Con estas xornadas, o Concello sinala que quere "favorecer a conciliación da vida laboral e familiar, promover a igualdade entre mulleres e homes e fomentar os principios de solidariedade e cooperación".

A Concellería de Igualdade recorda que puxo en marcha hai dous anos o "Banco do Tempo", un sistema de intercambio de servizos no que a unidade de intercambio habitual é unha medida de tempo, a hora, e non o diñeiro, que permite intercambiar, de xeito gratuíto, tarefas con outras persoas, empregando coma moeda simbólica o tempo.
Dende o xoves 24 de maio ás 09:00 Hs., o Salón de Actos da Confederación Empresarial de Ourense (Praza das Damas, 1) acolle a especialistas de recoñecido prestixio que afondarán no uso dos tempos e nas medidas de conciliación e estratexias que se deben pór en marcha dende o eido municipal para mellorar a calidade de vida dos seus veciños e veciñas.

O programa técnico das xornadas complétase cunha serie de actividades participativas nas que dinamizar as relacións interpersoais e coas que se tenta promover unha rede informal de contactos entre os membros dos diversos bancos do tempo de Galicia e abertas á participación de tódolos ourensáns, a través de obradoiros e un mercado de troco que se desenvolverá o sábado día 24 de maio a partir das 17.30h nos Xardíns de Bispo Cesáreo (Alameda do Concello).
As xornadas rematarán con actividades lúdicas a través dun circuíto termal e un percorrido turístico pola cidade.

Todas as actividades son gratuítas salvo o xantar que terá lugar nas termas de Outariz o domingo 25 de maio, que ten un prezo de 10 euros a ingresar antes do día 22 de maio.