O presidente da Deputación de Ourense, Manuel Baltar, presidiu a inauguración do campo de fútbol de A Moreira de Xinzo de Limia, que leva o nome de José Antonio Fernández "Carrera", o que  fora xogador, adestrador e presidente do Antela F. C., ademais de concelleiro de Deportes entre os anos 1993 e 1995.
O nome do campo aprobouse por unanimidade no pleno do concello, e quixo con esta distinción manter vivo o recordo deste destacado impulsor do deporte na Limia, falecido en 2008 aos 58 anos de idade.

No acto de inauguración do campo de fútbol participaron xunto co presidente da Deputación de Ourense o alcalde de Xinzo de Limia, Antonio Pérez, e o grupo grupo de goberno; a viuva e fillos de José Antonio Fernández "Carrera"; os concelleiros da oposición; o deputado provincial de Deportes, Luciano Rivero; os presidentes dos catro clubes de fútbol do Concello de Xinzo: Antela F.C., Piñeira F.C., Boado F.C. e E.D. Concello de Xinzo), así como a asociación de Veteranos Antela, os xogadores das categorías base e afeizoados e o presidente da Delegación Ourensá de Fútbol, José Luis Cachaldora.

A construción do novo campo de fútbol, propiedade do Concello de Xinzo, foi financiada pola Deputación de Ourense non 80% do seu presuposto con cargo ao Plan de Infraestruturas Deportivas, sendo o investimento da institución provincial de 240.000 euros.
Manuel Baltar destacou no acto de inauguración, no que estiveron presentes máis dun centenar de nenos e xóvenes pertencentes ás categorías de fútbol base de Xinzo, "a importancia do apoio ao deporte", afirmando que a aposta polo desenvolvemento de infraestruturas, proxectos e actividades relacionadas co deporte "son das iniciativas que máis satisfación poden dar a un responsable institucional, porque no deporte aúnanse os valores máis positivos do ser humano: esforzo, compañeirismo, saúde, colaboración, benestar e práctica da actividade física".

Baltar dixo que unha das mellores ensinanzas que lles podemos dar aos nosos fillos son a convivencia nun ambiente saudable e unha educación en valores, e iso é precisamente o que define ao deporte, e o que foi a traxectoria vital de José Antonio Fernández "Carrera", cuxo nome quedará para sempre no recordo do deporte en A Limia e na provincia de Ourense".