O presidente da Deputación de Ourense, Manuel Baltar, participou este martes en Madrid na reunión da Federación nacional de asociacións e municipios con centrais hidroeléctricas e embalses, na que se abordaron temas relativos á seca que aínda están a padecer moitas rexións de España. Baltar explicou os proxectos que está a desenvolver a Deputación de Ourense en materia de augas e as políticas e programas que neste ámbito está levando a cabo a institución provincial, favorecendo o aforro e a eficiencia a través da fusión de servizos aos concellos.

Manuel Baltar, membro da comisión executiva desta federación, destacou "a importancia de que as políticas medioambientais sexan especialmente activas e dinámicas nos pequenos concellos do rural, porque a riqueza e a competitividade destes municipios pasa por potenciar accións sostibles e por desenvolver iniciativas en clave ecolóxica e de protección do medio natural".
Baltar referiuse en concreto á xestión completa do ciclo da auga que fai a Deputación de Ourense, destacando o "Consorcio da Auga" que recentemente crearon os nove concellos de Valdeorras e a Deputación, así como os programas de saneamento e recollida de residuos sólidos dos que a Deputación de Ourense é un referente de ámbito nacional.

O presidente provincial afirmou que unha provincia como Ourense, caracterizada polo seu potencial hidroeléctrico "debe ser membro activo da Federación de embalses, para colaborar e formar parte da actividade institucional da federación, caracterizada polo asesoramento aos concellos e o desenvolvemento de programas que contribúan a dar solución aos problemas comúns as asociacións e concellos que integran este ente".
A Federación nacional de asociacións e municipios con centrais hidroeléctricas e embalses agrupa a un milleiro de concellos de España, e ten como obxectivo avanzar nas melloras medioambientais, económicas, de seguridade e de desenvolvemento social das comarcas onde están situadas presas e embalses.