"Pouco temos que celebrar no Día Mundial da Agua que se celebra este 22 de Marzo", asegura o colectivo Amigos da Terra ante a celebración deste xoves.
"Os nosos ríos ao seu paso pola cidade de Ourense estanse vendo atacados frecuentemente por vertidos incontrolados procedentes da incorrecta xestión dos sistemas de saneamento e depuración das augas, que conlevan á causación continua de danos ambientais a un recurso vital e limitado como é a auga", sinala Amigos da Terra ante unha data que o colectivo plantexa só de xeito reivindicativo.

Destaca que nos últimos meses véñense producindo continuos verquidos no río Miño, na zona das Pozas de Maión, verquidos no Barrio de Vistahermosa ao carón do paseo da Ninfas, verquidos da depuradora de Reza e os verquidos na Ponte do Milenium do pasado fin de semana que chegaron ata enfronte da zona da Chavasqueria.
"Con este espectáculo de malas augas, estase promocionando a imaxe turística da cidade Ourense Termal cun novo lema que reflexa mellor a realidade: Ourense Ten mal as augas", propoñen Amigos da Terra.

Sinala o colectivo que dispoñendo dunha estación de bombeo de augas inaugurada fai seis meses e que non está posta en funcionamento; unha depuradora de augas que non ten capacidade para tratar as aguas de saneamento; o río Miño sometido a seca e as variacións de caudais segundo os intereses das centrais hidroeléctricas; e o río Barbaña contaminado por sucesivos verquidos industriais, "chegamos xa a unha situación extremadamente residual", conclúe.
O colectivo pide as admnistracións públicas que exerzan as súas obrigas no cumprimento da lexislación.