A Deputación de Ourense participa por segundo ano no curso de Reciclaxe do Permiso de Conducir, iniciativa promovida pola Asociación de Autoescolas de Ourense e pola Dirección Xeral de Tráfico dentro do Proxecto “Coñecer é vivir”. Este proxecto ten como obxectivo actualizar os coñecementos sobre normas de tráfico e seguridade vial dos condutores co fin de reducir a siniestralidade e favorecer unha mellor condución.
O curso, de carácter gratuíto, terá lugar este xoves, día 1 de decembro, de 18.00 a 20.00 horas, nas 34 autoescolas pertencentes á Asociación de Autoescolas de Ourense, e poderán apuntarse todos os condutores que desexen actualizar a súa formación.

O presidente da Deputación de Ourense, Jose Luis Baltar, dixo que a seguridade vial “é cousa de todos, porque todos somos ou condutores ou peóns e debemos seguir unhas normas para que a convivencia no que atinxe á seguridade vial sexa o máis eficaz e ordenada posible”, e felicitou aos organizadores do curso “porque a formación continua nos aspectos do tráfico nos permite seguir actualizados nesta materia, algo que afecta directamente á nosa seguridade e polo que temos que seguir traballando día a día”.
Pola súa banda, David Llorente, xefe provincial de Tráfico en Ourense, dixo que o curso está dirixido a todos os condutores, “pero especialmente aos maiores de 65, porque se abordan temáticas que non se estudaban cando estas persoas obtiveron o carné de conducir, como as novas normativas no que atinxe a cruces e rotondas, bicicletas, peóns ou elementos reflectantes”.

Manuel González dixo que desde a Asociación de Autoescolas prevese que un ano máis este curso sexa un éxito: “O ano pasado tivemos 500 alumnos e este ano imos superar esa cifra”, e subliñou a necesidade de seguir facendo formación continua de alumnos e condutores veteranos e tamén dixo que ten unha grande importancia a formación dos profesores das autoescolas, “aspecto no que Ourense destaca porque os profesores das autoescolas da nosa provincia son os primeiros do Estado en participar nos Plans de Mobilidade”.