"O servizo municipal gratuíto Ourense Wifi continúa medrando a paso firme", sinalou o Concello de Ourense este mércores ao facer o concelleiro Agustín Fernández balance dos 10 primeiros meses de servizo.
Trala súa posta en marcha o pasado 1 de decembro de 2010, un total de 5.687 ourensáns xa desfrutaron das prestacións da rede, que acada ata 512 Kbs de velocidade. Segundo os datos proporcionados pola empresa concesionaria da xestión, GOWEX, se reflicte un total de 82.949 sesións, cunha media de 60 minutos por sesión.

Os datos manifestan unha media de 568 novos usuarios ao mes aos que se facilita o acceso gratuíto ás novas tecnoloxías, dando conexión permanente a Internet dende unha vintena de espacios públicos da cidade.
Con respecto ao perfil dos usuarios, a rede é empregada por usuarios de tódalas franxas de idade, sendo o 74 % dos usuarios menores de 35 anos. Asimesmo, dos datos proporcionados pola empresa extráese unha tendencia dun uso maior por parte das mulleres, que fai uns meses só eran o 41 % de usuarios e neste mes igualaron o uso con respecto aos homes, ata acadar un 49% dos usuarios.
Como curiosidade, cabe destacar a franxa horaria entre as 20:00 Hs. e as 21:00 Hs como a de maior tráfico de datos.

Ampliación a 10 novos puntos

Trala execución completa da ampliación da rede “Ourense wifi”, un total de 42 zonas da cidade terán conexión gratuíta a Internet, a unha velocidade que alcanza os 512 Kbs. A conexión permite consultas sinxelas como email, visita de páxinas web ou lectura de prensa, cumprindo deste xeito as normativas fixadas pola CMT.