A concelleira de Benestar Social e Saúde, Marga Martín, presentou este martes as IV Xornadas Interculturais, que se celebrarán esta fin de semana nos Xardíns de Bispo Cesáreo e que organiza o Concello de Ourense a través desta Concellería. "Dende o Concello apóstase polo recoñecemento da interculturalidade como elemento estructural e transformador da sociedade ourensana, e que implica a xeración de actitudes baseadas na empatía e na comprensión mutua", sinala o departamento de Marga Martín.

O lema deste ano é “interculturalidade na escola” referido a unha das novidades desta edición: achegar a inmigración ós alumnos de colexios de Educación Primaria da cidade de Ourense, a través de charlas impartidas por inmigrantes residentes no municipio.
As charlas xa comezaron a semana pasada, e celebráronse nos centros de Educación Primaria e na Universidade (CEIP O Couto, no Colexio Cardenal Cisneros, Colexio Padre Feijoó Zorelle, Colexio Manuel Sueiro e na Universidade de Vigo no Grao de Traballo Social e no Ciclo de Formación Profesional Integración Social).

A carpa instalada nos Xardíns de Bispo Cesáreo acollerá durante toda a fin de semana stands de arte, cultura e gastronomía que abrirán as súas portas as 19.00 horas do venres 28 de outubro ata peche e o sábado dende as 12.00 da mañá, coa presencia de representantes de Venezuela, Colombia, República Dominicana, Argentina, Sahara, Algeria e Senegal, animación musical a partir das 21.00 h e stands de animación lúdico infantil dende as 18.00 ata as 21.00h o venres e de 10.30h a 13.30h e de 18.00h a 21.00h.
O stand de animación lúdico infantil inclúe como actividades collages cooperativos, contos, debuxo ou globoflexia coa finalidade de que nais e pais poidan disfrutar das xornadas e sensibilizar ós cativos acerca da interculturalidade.

O obxectivo das xornadas é fomentar o coñecemento das diferentes culturas que conviven na cidade e divulgar o dinamismo dos colectivos inmigrantes residentes en Ourense, así coma sensibilizar á poboación ourensá sobre a inmigración.
Dende a Concellería de Benestar Social preténdese crear, especialmente durante a celebración das xornadas, un espazo de convivencia, de intercambio de experiencias entre os inmigrantes e o resto dos ourensáns.