Producido pola Fundación Galiza Sempre e IB Cinema, o documental “MEMORIA do nacionalismo galego” percorre os cento setenta últimos anos da historia política, social e cultural de Galiza a través das ideas e das organizacións políticas que crearon o nacionalismo galego.
Dende o Rexionalismo do século XIX, ata Castelao e o Estatuto do ano 1936, dende a Transición Democrática ata o pasado recente, o documental, que poderá verse na Fundación Vicente Risco de Allariz este venres, 21 de outubro, ás 20:00 Hs., é un percorrido por algunhas das principais experiencias e ideas que axudaron a conformar a nación galega.

O acto contará coa presenza do Francisco García, alcalde de Allariz, e dos tres directores do documental, Xabier Macías, Comba Campoy e Xosé Zapata.
O traballo reúne por vez primeira aos máis destacados especialistas e protagonistas na traxectoria do nacionalismo galego dende mediados do século XIX aos nosos días.
A obra basease fundamentalmente nos testemuños das 27 persoas entrevistadas, directamente relacionadas coa traxectoria do galeguismo político: historiadores, teóricos, sindicalistas, políticos e intelectuais. A pluralidade de puntos de vista recollidos nunha única obra é un dos méritos da produción.

Máis de 30 horas de gravación deron finalmente en algo máis de hora e media na que interveñen, entre outros, Xusto Beramendi, Xosé Manuel Beiras, F. Fernández del Riego, Camilo Nogueira, Margarita Ledo, Avelino Pousa Antelo, Isaac Díaz Pardo, Pilar García Negro, X.L. Méndez Ferrin, Bautista Álvarez, Lidia Senra, Francisco Rodríguez, Anxo Quintana, Antón  Moreda, Encarna Otero ou Xose Ramón Barreiro.
A proxección está organizada pola Fundación Galiza Sempre coa colaboración da Libraria Aira das letras e a Fundación Vicente Risco.