As relacións humanas, cos seus aspectos económicos, históricos, antropolóxicos e sociais, é o elemento principal da obra Oír o galo cantar dúas veces, da antropóloga portuguesa Paula Godinho, que gañou a XV edición do Premio Taboada Chivite que convoca a Mancomunidade de Municipios da Comarca de Verín para traballos de investigación científica sobre temas antropolóxicos, históricos e arqueolóxicos.
A obra, editada pola Deputación de Ourense, foi presentada hoxe na institución provincial coa presenza da autora, do presidente da Deputación, José Luis Baltar, e do fillo de Taboada Chivite, Xesús Taboada, entre outros.

Paula Godinho dixo que este é un libro sobre “unha fronteira de convivencia, na cal, a pesares de ser dous países diferentes, ao longo de toda a súa historia ten habido unha familiaridade e un entendemento mutuo por parte de todos os veciños, e iso é algo moi enriquecedor para o ser humano”.
A autora, que é profesora de Antropoloxía da Facultade de Ciencias Sociais e Humanas da Universidade Nova de Lisboa, divide a obra –de máis de 600 páxinas- en tres partes: unha primeira, antropolóxica, na que se describen as relacións de veciñanza a un e outro lado da Raia; unha segunda parte histórica, na que se relata como se fixo a fronteira nos despachos de Lisboa e Madrid a raíz do Tratado de 1864; e finalmente unha última parte na que da conta de dous acontecementos históricos ocorridos nos anos 1939 e 1946 e que inciden directamente nas relacións de convivencia.

Pola súa banda, José Luis Baltar felicitou a Paula Godinho polo documentado traballo que foi merecedor do premio e dixo que a Deputación de Ourense ten mostrado interese no apoio da publicación dos premios Taboada Chivite “porque entre os seus obxectivos está o fomento e a difusión da creación artística, literaria e científica na provincia de Ourense, e porque os traballos gañadores adoitan estudar as relacións de Galicia e Portugal nos seus aspectos históricos, antropolóxicos ou arqueolóxicos e sempre relacionados coa nosa provincia”.

Baltar afirmou que o traballo premiado este ano estuda a área dos concellos de Chaves, polo lado portugués, e de Vilardevós, Verín, Oímbra e Cualedro, en Ourense, “e desenvolve un tema especialmente interesante, pois a fronteira galaico-portuguesa é un fenómeno cultural complexo en toda a súa extensión, unha zona porosa aos fluxos de persoas, bens e saberes e diso trata esta publicación que ven de editar a Deputación provincial”.
O presidente da Deputación dixo que a Raia foi máis una división administrativa e xeográfica “pois para os veciños dun e doutro lado tal división nunca existiu no que atinxe ás relación humanas, que sempre foron fondas, cordiais e duradeiras no tempo”.