A Universidade de Vigo e o Consello Xeral do Poder Xudicial (CXPX), coa colaboración da Deputación de Ourense, organizan as “II Xornadas sobre Comunicación e Xustiza”, que terán lugar os días 13 e 14 de outubro, xoves e venres próximos, no Centro Cultural da Deputación de Ourense.
Este foro de encontro e debate traerá a Ourense destacados xuristas e xornalistas, entre os que figuran o maxistrado Fernando Grande-Marlaska ou a xornalista Cristina Villanueva, que nesta edición debaterán sobre o tema: “A información sobre casos sensibles”, un asunto de plena actualidade e que tanta controversia xera na sociedade e nos medios de comunicación.

O xoves, día 13, ás 17.00 horas, terá lugar no salón de actos do Centro Cultural a inauguración das xornadas, coa presenza do presidente da Deputación de Ourense, José Luis Baltar; o vicepresidente do CXPX, Fernando de Rosa; o presidente do Consello Social da Universidade de Vigo, Ernesto Pedrosa; a vicerreitora do Campus de Ourense, María Lameiras; o decano do Colexio de Avogados de Ourense, Arturo González; e a profesora de Dereito Procesal e directora das xornadas, Inés Iglesias.

De seguido, desenvolverase a mesa redonda: “A información xudicial nos supostos da violencia de xénero”, na que participarán Inés Iglesias, Ángeles Carmona, secretaria xudicial; a xornalista Cristina Villanueva e o director de Comunicación do CXPX, Agustín Zurita.

O venres, 14 de outubro, ás 9.30 horas, terá lugar unha mesa redonda sobre “A incidencia da noticia xudicial nos procesos mediáticos”, coa participación do maxistrado Fernando Grande-Marlaska, o profesor Fernando Ramos, o xornalista Raúl Quián, e a directora de Comunicación do Tribunal Superior de Xustiza de Galicia, María Montero.
A clausura das xornadas terá lugar ese mesmo venres, ás 12.00 horas, coa presenza de Antonio Dorado, vogal do CXPX, e de Miguel Michinel, decano da Facultade de Dereito do Campus de Ourense.

Fernando Grande-Marlaska