O Auditorio Municipal de Ourense acolleu este xoves o acto de entrega das bolsas a deportistas individuais que o Consello Municipal de Deportes vén de conceder por segundo ano consecutivo “como recoñecemento e apoio a traxectorias destacadas de deportistas individuais ourensáns”. A Tenente Alcalde, Isabel Pérez, e o Concelleiro de Deportes, Fernando Varela, fixeron entrega de até 52 bolsas dirixidas a atletas de diferentes modalidades deportivas como ximnasia, natación, wushu ou halterofilia. 
Esta modalidade de axudas ao deportes foi introducida pola Concellaría de Deportes o pasado ano como “reforzo e respaldo a casos particulares de deportistas que non tiñamos posibilidade de abordar co habitual sistema de axudas”.
A dotación orzamentaria para esta edición  ascedeu aos 25.000 euros.

A Concellaría de Deportes, a través do Consello Municipal resolveu por en marcha estas axudas “para  a mellora a perfeccionamento de deportistas que teñan destacado en competicións oficiais de carácter individual” e estableceu ao respecto tres liñas diferentes de axudas “que responderan as realidades individuais dos beneficiarios”: de iniciación, destinadas a deportistas menores de 21 anos cunha cuantía máxima de 1.200 euros; de cualificación, para deportistas que presenten unha traxectoria deportiva relevante, cunha cuantía máxima de 1.300 euros; e de alto nivel, para deportistas que acaden a condición de alto nivel pola xunta de Galicia, cunha cuantía de 1.500 euros.