O portavoz nacional do BNG, Guillerme Vázquez, sinalou en Ourense este martes que, se chega a gobernar, o PP levará a Madrid, “a mesma política que Feijóo está practicando na Galiza. Esa política que nos leva a liderar o paro e a que a caixa non valga nada e os directivos se xubilen con pensións multimillonarias”.
O líder nacionalista acudiu á presentación dos candidatos e candidatas do BNG pola provincia de Ourense ás eleccións do 20-N, e diante de As Burgas ironizou dicindo que “non fai falta ser adivino para saber o que fará Rajoy na Moncloa, o PP que se presenta como o cambio, no mellor dos casos será o recambio”.

A lista do BNG está encabezada por Xosé Manuel Pérez Bouza ao Congreso, e complétana Susana García, número 2, e Manuel Agra Villar, reponsable local do BNG no Barco de Valdeorras, e María Teresa Barge Bello, alcaldesa de A Bola, nos números 3 e 4, respectivamente.
Ao Senado aspiran a concelleira en Allariz, Teresa Devesa Graña, o sindicalista da CIG, Xosé Ramón González Losada, e o membro do Consello municipal do BNG no Ribeiro, Xosé Manuel González Vilas.

Precisamente Xosé Manuel Pérez Bouza amosou a súa confianza en que o BNG conseguirá representación pola provincia, e lembrou que “o BNG é a única posibilidade de que o PP non incremente a súa representación en Ourense”.
“O BNG é a forza máis útil, a que defende os intereses da nosa provincia e así o demostramos”, xa que, segundo relatou, “non houbo un problema que non merecese unha iniciativa do BNG nestes anos. Temos o aval do traballo feito frente ao PP e ao PSOE”, dixo o que nesta lexislatura pasada fora senador do BNG por designación autonómica.
A tenenta de alcalde e portavoz municipal do BNG no Concello de Ourense, Isabel Pérez, destacou na súa intervención a valía dos candidatos e candidatas nacionalistas, “a equipa da casa, dispostos a xogar este partido para defender a Galiza”.
Todos e todas van facer unha campaña “de proximidade” e son os únicos que se preocupan “polos problemas da xente”, sinalou Isabel Pérez.