A cidade de Ourense liderará a área de Innovación Termal da Asociación Europea de Cidades Históricas Termais (EHTTA). Na  reunión deste vernes da Asamblea Xeral da asociación, aprobouse a proposta realizada por Ourense de constituír unha área de investigación termal que deseñe e promova proxectos destinados a poñer en valor os recursos termais para mellorar a oferta turística das cidades europeas.
Os proxectos deseñados en Ourense servirán así de referente para as demáis cidades que forman a asociación (26 en total), entre as que se atopan vilas co potencial, tradición e prestixio en materia termal de Bath (Inglaterra), Budapest (Hungría), Vichy (Francia), Spa (Bélxica) ou Karlovy Vary (Chequia), entre outras.

A Asamblea da asociación de cidades acordou encomendar a Ourense o liderazgo da nova Área de Investigación Termal, tendo en conta factores como a riqueza termal da cidade, o seu patrimonio histórico-artístico, e natural, conxuntamente co seu potencial de investigación aplicada ó sector, en estreita colaboración coa Universidade, a través do campus de Ourense, e a súa condición de sé de certames como a feira Termatalia, plataforma e punto de encontro dos profesionais do sector a nivel nacional e internacional.
Segundo informa os respresentantes do Concello de Ourense nesta asamblea que se celebrou en Spa, Bélxica, José Ángel Vázquez Barquero e Isabel Pérez, “foi suliñado moi especialmente polas cidades membro da asociación como un elemento de especial interese o perfil de usuarios do termalismo en Ourense. Nun sector, o termal, no que a maioría de usuarios nas diferentes cidades europeas adoitan a ser persoas maiores, chama a atención o feito de que en Ourense súmase un importante número de mozos e persoas de mediana idade, confirmando a capacidade do producto termal para ser atractivo para todo tipo de públicos”, destácase.

A proposta aprobada pola Asamblea de Asociación Europea de Cidades Históricas Termais foi defendida pola delegación de Ourense, formada pola tenente de alcalde e concelleira de Cultura e Turismo, Isabel Pérez, o concelleiro de Promoción Económica e Emprego, José Ángel Vázquez Barquero, e o autor do Plan Estratéxico Termal, Mario Crecente. A este respecto, confirmaron que o traballo a desenvolver dende Ourense centrarase na innovación destinada a ofertar un mellor producto turístico, que redunde de xeito directo no desenvolvemento económico, investigar nunha nova lectura dos recursos patrimoniais así como dos naturais (ríos, biodiversidade…), a oferta cultural ou a gastronomía para, en definitiva, promover innovación dende Ourense, para a nosa cidade pero tamén para tódalas cidades da asociación.

O Concello de Ourense promoverá a constitución dun equipo de traballo no que convidará a participar á Universidade de Vigo, e ó sector empresarial galego, a través da Asociación de Balnearios de Galicia, que achegará a experiencia dos seus empresarios en materia de desenvolvemento termal, conxuntamente con técnicos en termalismo, coa finalidade de traballar conxuntamente no deseño das propostas de acción que presentará ante a Asociación Europea.