O Secretario Xeral da Emigración, Santiago Camba, animou aos mozos arxentinos a “participar no presente” das entidades galegas que “é o que fai de Galicia un territorio sen fronteiras, unha Galicia Universal”.
O fixo Camba ao presidir a xuntanza preparatoria cos mozos participantes no programa de Campamentos e Campos de Traballo 2011 da Xunta de Galicia. O encontro celebrouse na Escola de Hostalería do Centro Galicia de Bos Aires.

Na xuntanza, Santiago Camba chamounos a “espertar todos os sentidos” nesta viaxe que realizarán “á terra dos devanceiros” e no que terán ocasión de compartir “o sentimento común que definimos como galeguidade con mozos “belgas, venezolanos ou brasileiros”. “Con todos eles compartides un mesmo sentimento de pertenza, máis aló do voso lugar habitual de residencia”, explicou.
Neste sentido, Santiago Camba engadiu que “a permanencia deste sentimento e das relacións existentes entre os galegos residentes no exterior e a Galicia territorial” fundaméntanse tamén no “indubidable e imprescindible apoio dos centros galegos repartidos por todo o mundo”.
Así, instounos a “recoñecer a súa valía e actualizar o seu funcionamento e prestacións”. Camba propuxo aos mozos “xogar un papel fundamental” nestas institucións e “favorecer os procedementos necesarios para que pasedes de ser o futuro a situarvos como presente dos centros galegos”.

Para Camba estas viaxes de campamentos teñen “unha simboloxía moi especial” e asegurou que a Xunta de Galicia está a facer un importante esforzo para manter esta actividade. Camba comprometeuse a recibilos en Santiago de Compostela e amosouse aberto a todas as “propostas que os mozos queiran facerlle chegar como responsable da área de Emigración do Goberno galego”.

158 participantes de Arxentina nos Campamentos

O programa de actividades de campamentos e campos de traballo para o ano 2011 ten por finalidade facilitar á mocidade da Galicia exterior o contacto coa realidade galega e o encontro cos seus familiares.
Poden participar nesta actividade os mozos e mozas descendentes de galegos, que teñan nacionalidade española e que teñan residencia habitual fóra da Comunidade Autónoma. Ademais, deberán estar inscritos nun concello galego no Censo Electoral de Residentes Ausentes (CERA) e ter a idade solicitada para cada modalidade.

Este ano viaxarán un total de 158 mozos desde Arxentina con esta convocatoria. 146 deles, de entre 14 e 20 anos, participarán na modalidade de Campamentos e os 12 restantes, de entre 18 e 30 anos de idade, desenvolverán actividades de arqueoloxía, animación sociocultural, social e ambiental na categoría de Campos de Traballo.
Na quenda do 1 ao 12 de xullo terá lugar a actividade “Galicia, verde e azul”, que busca achegar un mellor coñecemento do país. Nela participarán mozos de entre 14 e 17 anos que residirán seis días no campamento xuvenil Os Chacotes de Palas de Rei (Lugo) e outros seis días no albergue xuvenil de Gandario de Bergondo (A Coruña).
Na segunda quenda, do 17 ao 28 de xullo, desenvolveranse as actividades co nome de “Rotas coñece Galicia” para mozos de entre 14 e 20 anos baixo a modalidade de campamento itinerante.

Xa no caso dos Campos de Traballo, para mozos de 18 a 30 anos, realizaranse actividades de colaboración desinteresada e voluntaria en traballos para o mellor coñecemento da cultura, a mellora ambiental e recuperación do patrimonio cultural e arquitectónico galego.