Este martes, segunda xornada oficial das Festas de Ourense, abren as Casetas Gastronómicas. Segundo a organización, “unha das actividades máis agardadas” que contabilizan xa sete anos.
A inauguración será ás 7 da tarde e as casetas estarán abertas tódolos días até a unha da maña. Pola mañá abrirán ás once até as catro da tarde.

A novidade deste ano é a incorporación de Cataluña, que participa por primeira vez, e que ofrecerá sabores tan exclusivos como a butifarra.
Coma en edicións anteriores, cada caseta ofertará o máis típico da súa área: na de Asturias, sidra natural escanciada, patacas ó cabrales, chourizos á sidra ou fabada “si no aprieta demasiado el calor”, segundo sinala a Coordinadora de montaxe e representante de Asturias, Irene Vázquez.
Desde Andalucía ofreceranse degustacións de pescado frito, ibéricos e tostas de xamón ibérico con tomate e aceite, regadas por fino, manzanilla e rebujito.
E Cuba ocuparase da sobremesa, cunha ampla variedade de cocteis. A coordinadora das Casetas Gastronómicas asegura que “la gente ya nos conoce, las Casetas son un lugar de encuentro, y hay gente que nos está esperando de un año para otro”.

Mostra de Teatro na rúa

Tamén este martes comeza a décimo quinta edición da Mostra de Teatro na rúa, cun espectáculo da compañía catalana “La Baldufa”, premiado en certames nacionais e internacionais. Titúlase “Zeppelin”, e inclúe un dirixible que “surcará” o ceo ourensán.
A representación dura unha hora e terá lugar ás 12 da mañá e ás oito da tarde, na Rúa do Paseo.

A Mostra de Teatro na rúa prolongarase ata o venres.
O mércores (12.00 e 20.00h, nos Xardíns de Padre Feijóo) poderemos ver o espectáculo “Trogloditas” de Tanxarina Títeres, premiado na última edición dos María Casares de Teatro, e no que interactúan títeres e actores. E pola noite (ás 22.30h), a praza de San Marcial recuperará o seu carácter de escenario de títeres, como foi nos anos setenta, cunha “Farsa para títeres para adultos” escrita por Eduardo Blanco Amor: “Amor e Crimes de Juan Pantera”, de Títeres Alakrán.

Nena Daconte

O Xardín do Posío acolle este martes o segundo dos grandes concertos das Festas de Ourense, 2011. Si o venres abríu Andrés Calamaro, este martes chega Nena Daconte co seu terceiro álbum “Una mosca en el cristal”, con “Priscila” como teloneira.

O concerto será gratuito e comezará aproximadamente ás dez da noite, aínda que a apertura de portas será xa ás 21:00 Hs.